Gawat

May panahong kailangang iwan kita
habang ika’y aking hinihintay na mamukadkad
at handa nang anihin ang bunga
ng ating pag-iisa. 

H’wag ka sanang malungkot
kung sakaling ako’y lalayo,
kung sakaling ako’y kunin 
bilang manggagawa sa konstruksyon
o kargador sa bodega ng sigarilyo.

H’wag mo sanang isipin 
Na kaya kitang limutin
‘di mangyayari ‘yun!
Naka-ugnay kaya ang aking bituka
sa mga ginintuang butil sa ‘yong ulo.

Isa lang ang hiling ko,
ikaw muna sana ang bahala sa mag-iina ko
at pagbalik ko
asahan mo ang pasalubong ko sa ‘yo—
bagong panali, bagong karayom at bagong sako.

Sa dapit-hapon, alalahanin mo lang 
ang mga sandaling nagpapalipad ako ng saranggola,
sa agaw-dilim, balikan mo ang mga salamisim
kung paano nag-alay noon si Inang ng atang
sa matandang puno ng Mangga,
sa bukang-liwayway, hayaan mong tangayin ka
ng malamig na patubig mula batis,
hayaan mong manuot sa kaibuturan mo
ang bawat hampas ng panabas sa pilapil
ang bawat paglusak ng kalyadong paa sa ‘yong dibdib
ang bawat pagbaon ng mga daliring tangan
ang binhi ng kanilang pag-asa
ang bawat patak ng pawis at luhang
umaasam na ika’y maging kanila
balang araw.

Setyembre 18, 2018
Lunsod ng Queson, Maynila

*Ang salitang ‘gawat’ ay salitang iloko na ang ibig sabihin ay tiempo muertos; ang ‘atang’ naman ay alay na pagkain para sa mga lamang-lupa.  

Si Rene Boy Abiva o RBA ay dating bilanggong politikal. Nagsusulat siya ng tula at maikling kuwento sa wikang Iloko at Filipino. Siya ang awtor ng Tuligsa at iba pang mga tula (Pantas Publishing, Lungsod Quezon, 2018) at naging kontribyutor sa Hulagpos: Kalipunan ng mga tula ng mga Bilanggong Politikal (Selda, Lungsod Quezon, 2016) at AKDA Volume 5 (Kamandag, Lungsod Quezon, 2019). Isa siya sa mga patnugot ng Pandayan ng Paninindigan: Pagbisita at iba pang mga tula ni Ben Concio Quilloy (ASCENT, Lungsod Quezon, 2019). Nalathala na ang kanyang mga tula, digital at printed, sa Liwayway Magazine, Bannawag Magazine, Philippine Collegian ng University of the Philippines- Diliman, Pinoy Weekly, Bulatlat.com, Northern Dispatch Weekly, Manila Today, Kodao.org, PinoyReporter.com at marami pang iba. Fellow siya ng 11 th Palihang Rogelio Sicat (Maikling Kuwento) ng Unibersidad ng Pilipinas- Diliman, 6 th Cordillera Creative Writing Workshop (Tula) ng Unibersidad ng Pilipinas- Baguio, 9 th Pasnaan- Jeremias A. Calixto Ilokano Writers Workshop (Daniw) ng GUMIL o Gunglo Dagiti Mannurat Ti Iloko at Mariano Marcos State University at 58 th University of the Philippines National Writers Workshop (Tula). Siya ay miyembro ng Kilometer (KM) 64 Writers Collective at Concerned Artists of the Philippines.

Leave a comment

Your email address will not be published. Required fields are marked *

%d bloggers like this: