Sa kasilaw sa adlaw
gagilak ang kaputi
sa iyang sanina.
Mora siyag santa
sama sa iyang mga gi-ampuan.
Iyang ulo gipandungan
og bilo. Iyang mata
mingpiyong. Iyang baba
mingsampit og paghimaya.
Gidayeg ang bugnawng marmol nga rebulto.
Andam na iyang palad modawat sa lawas
ni Kristo. Sa gawas sa simbahan
aduna poy mga palad nga gahulat
og grasya. Gabagting ang ilang mga lata.
Gapangamuyo,
wala sa marmol nga rebulto,
apan sa mga taong lumalabay gipangita
ang gisaarang kaluwasan. Para kanila
ang mga sinsilyo ang lawas sa bag-ong mesias.
Sa iyang pagtangtang sa puting pandong
gisugat siya sa mga makililimos.
Wala ingon niya.
Wala siya milingi.
Wala siya nagbali-bali.
Walay gibati iyang kasingkasing
morag bato
sama sa rebultong marmol nga iyang gidayeg.
By Gilford Doquila
Gilford Doquila was born and raised in Cagayan de Oro City. After moving further south in Mindanao, in Davao, he completed his degree in BA English major in Creative Writing at the University of the Philippines Mindanao. Presently, he is teaching high school students in a Montessori school in Quezon City.
John Rafael Alcantara 
Hezron Pios 
Andre Aniñon