Categories
Play

Ganito Ang Pinangarap Kong Kasal

MGA TAUHAN

FRANCE mid 20s, bading pero hindi loud

KRIS mid 20s, bestfriend ni France, sweet at pleasant

NOEL mid 20s, boyfriend ni France, pogi, pa-mhin 

TAGPUAN

Iba’t ibang tagpuan sa paglipas ng panahon

PANAHON

Saklaw ng dula ang college days ng mga tauhan hanggang sa kasalukuyan

PALIWANAG

Ang banghay ng dula ay hindi conventional. Minarapat ng mandudula na pumili ng mga eksenang sasaklaw sa kwentong nais niyang ilahad. Kinakailangan ng devised transitions para sa maayos na daloy ng dula.

ANG DULA

Kasabay ng pagbubukas ng ilaw, maririnig ang pagtunog ng kampana na naghuhudyat na may nagaganap na kasal. Makikita sa entablado sina FRANCE at NOEL, magkatabing nakatayo sa harap ng altar. Pormal ang kanilang suot na damit.

FRANCE

Ganito ang pinangarap kong kasal para sa’tin. Natupad na.

(Tititig sila sa isa’t isa. Kukunin ni NOEL ang kaliwang kamay ni FRANCE. Mahigpit silang mag-ho-holding hands. Muling kakalembang ang kampana kasabay ng pagdidilim ng entablado.)

(Sa muling pagbubukas ng ilaw, makikita si KRIS, nagsusulat sa kanyang diary/journal. Hinihintay niya ang nagbibihis na si FRANCE.)

KRIS

Bes, bilisan mo naman dyan. Hindi tayo makapag-kwentuhan ng maayos, e.

FRANCE

(VO.) Saglit na lang. Nag-ba-bra lang ako.

KRIS

Antagal-tagal. Kaya palagi kang nale-late sa klase, e. Ang kupad-kupad!

FRANCE

Heto na nga! Andaming kuda! (Papasok sa entablado.) Ano nga yung sinasabi mo?

KRIS

(Very enthusiastic.) Sabi ko, ‘pag nag-asawa ako, lima yung gusto kong magiging anak.

FRANCE

Limang anak? Wow! Do you have any idea kung gaano kahirap magkaroon ng anak?

KRIS

Wala pa. Hello, hindi pa naman ako nabubuntis. Gusto ko ng limang baby para marami akong aalagaan.

FRANCE

Ang sabihin mo, ipinaglihi ka talaga sa gabi. Pustahan tayo, during your first delivery, isusumpa mo na ang panganganak.

KRIS

May caesarean procedure naman. Tsaka painless operation. Kakayanin ko yun.

FRANCE

Mahal kaya yun. Mamumulubi ka.

KRIS

Sino naman nagsabi sa’yong mag-aasawa ako ng mas mahirap pa sa’min? Syempre, bukod sa dapat headturner siya, kailangan kaya niya ring buhayin ang magiging pamilya namin.

FRANCE

Alam mo, Bes, may tawag dyan sa mga qualification mo.

KRIS

Oo na, alam kong masyadong ideal. Pero so what? Dapat lang naman na ideal tayo when it comes to love.

FRANCE

Hindi ideal, Bes. Ilusyon. Ilusyon ang tawag dyan. Sa panahon ngayon, lalaki na lang ang may trabahong mang-anak. Yung bumuhay, inako na yun ng mga beki.

KRIS

Anong gusto mo? Ikaw na lang ang pakasalan ko?

FRANCE

Eeew. Not even over my dead, delectable body.

KRIS

Aba, ikaw pa talaga ang tumanggi. As if naman papayagan kitang tikman ako.

FRANCE

Excuse me, hindi ko ever gugustuhin. Alam mong allergic ako sa tahong.

KRIS

Excuse me rin, hindi ito tahong. Mediterranean cuisine ‘to. At kahit beki, hindi ito mahihindian.

FRANCE

Kung totoo yan, bakit wala ka pa ring jowa?

KRIS

Eh, hindi ko pa naman kasi nire-release yung menu.

FRANCE

Bes, panis na yan!

KRIS

Of course not. Gusto mong amuyin?

FRANCE

Kadiri ka! Hindi ako mahilig sa exotic. 

KRIS

Bes, may tanong pala ako.

FRANCE

Seatwork mo na naman sa Algebra?

KRIS

Hindi. Close ba kayo nung classmate mong Math major sa Philosophy class?

FRANCE

Math major?

KRIS

Oo.

FRANCE

Babae?

KRIS

Hindi.

FRANCE

Lalaki?

KRIS

Oo. Yata.

FRANCE

Gwapo?

KRIS

Oo!

FRANCE

Matangkad? Matikas?

KRIS

Oo! Oo!

FRANCE

Tahimik?

KRIS

Pwede.

FRANCE

Magaling pumorma?

KRIS

Oo! Siya nga!

FRANCE

Bading yun.

KRIS

Hindi.

FRANCE

Eh, sino ba yun?

KRIS

Ikaw nga yung tinatanong ko. Groupmate mo sya dun sa report nyo last week.

FRANCE

Ahh. Si— sino dun?

KRIS

Dalawa lang naman kayong lalaki dun sa grupo.

FRANCE

Ahh, si Emmanuel.

KRIS

Wow. Emmanyuwel. Beautiful name. It means God is with us.

FRANCE

Ang landi mo.

(Maririnig ang school bell. Lipat-tagpo. Lalabas ng entablado si KRIS. Papasok naman si NOEL, naka-backpack. Nasa labas na ng classroom nina NOEL at FRANCE nung college. Kakatapos lang ng klase.)

NOEL

France!

FRANCE

(Lilingon.) Yes?

NOEL

France, di ba?

FRANCE

Oo. Bakit?

NOEL

Manghihiram sana ako ng handouts mo sa Philo. Kulang kasi yung sa’kin.

FRANCE

No problem. Kaya lang hindi ko dala eh.

NOEL

That’s okay. Kung pwede, kahit next meeting na lang. Ayy sorry, Emmanuel pala. (Iaalok ang kamay.)

FRANCE

Yeah. God is with us.

NOEL

Huh?

FRANCE

Di ba yun yung meaning ng pangalan mo?

NOEL

Ah, oo. Pero Noel na lang. Para hindi masyadong high school.

FRANCE

Christmas.

NOEL

Yeah. Noel is an alternative word for Christmas. Pero etymologically speaking, it actually means birth.

FRANCE

Naks! Genius!

NOEL

Genius ka dyan. I just take time to know myself more. Tsaka ikaw kaya ang genius. Laging perfect sa quiz ni Ma’am.

FRANCE

Echosera!

NOEL

Huh?

FRANCE

Ah, wala. Sabi ko, thanks.

NOEL

Ah, akala ko tinawag mo kong echosera. Pero paano ka nga ba nag-ta-top lagi? Ako palagi na lang nasa bottom, e.

FRANCE

Gusto mong mag-top?

NOEL

Oo. Sabay naman tayong mag-aral para sa midterm.

FRANCE

Oh, sige. Okay lang. Isasama ko rin si Kris.

NOEL

Kris? Girlfriend mo?

FRANCE

Ay, hindi. Bestfriend ko yun. Gusto ka rin niya kasing makilala.

NOEL

Ha? Bakit naman nya ko gustong makilala?

FRANCE

Ha? Anong gustong makilala? May sinabi ba kong ganun?

NOEL

Oo kaya! Aha, pinag-uusapan nyo ko nung bestfriend mo, ha.

FRANCE

Wag ka ngang feeling.

NOEL

Eh, bakit nya ko gustong makilala?

FRANCE

Wala nga. Wala akong sinabing ganun.

NOEL

Meron. Sabihin mo na sa’kin kung bakit. Dali!

FRANCE

Wala lang yun.

NOEL

Sige na. Sabihin mo na. Eee, sasabihin na niya.

FRANCE

Pilitin mo pa ko.

NOEL

Sige na. Please. Please. Pretty please.

FRANCE

Ah— eh— kasi—

NOEL

Kasi?

FRANCE

Kasi daw crush ka nya.

NOEL

Sus. Yun lang naman pala.

FRANCE

Wow. Heartthrob ka pala.

NOEL

Hindi naman. Bakit ikaw, hindi mo ko crush?

FRANCE

Ha?

NOEL

Ayan ka na naman. Nakakabingi ba ang presence ko?

FRANCE

Ano bang pinagsasasabi mo?

NOEL

Ang sabi ko, hindi mo ba ko crush?

FRANCE

Ha? Bakit?

NOEL

Kasi ikaw, crush kita.

(Maririnig ang school bell. Lipat-tagpo. Lalabas ng entablado si NOEL. Papasok naman si KRIS.)

KRIS

BES! My god! Super kinikilig talaga ako!

FRANCE

Bakit? May concert na naman yung idol mong Japanese boy band?

KRIS

Hindi yun. Ni-like kasi ni Noel yung FB status ko.

FRANCE

Para yun lang.

KRIS

Anong yun lang? Ibig sabihin nun, nagustuhan niya yung sinabi ko.

FRANCE

Eh, ano bang ini-status mo?

KRIS

Sabi ko, “Maaari bang malaman ko kung feel na feel mo nang sabihin, sana ay sabihin na ito. Request ng puso ko’y ikaw, kung tameme ka, Tsong, ako na ang manliligaw.” Oh, di ba?!

FRANCE

Kadiri ka talaga. Paanong hindi niya ila-like yun, eh, die hard fan yun ni Jolina.

KRIS

Oh my god! We’re so meant to be! Pareho kami ng paboritong artista! Ipapakita ko kay Noel yung Jolina doll collection ko! Naku! Maiinlove yun sa’kin nang todo!

FRANCE

Naku! Maiinggit lang yun sa’yo.

KRIS

Ha?

FRANCE

Ahh, sabi ko maiinggit yun sa’yo lalo nang may mga signatured cassette tape at CD ka pa ni Jolina, di ba?

KRIS

Eh ‘di, ipapahiram ko rin sa kanya yung mga yun. O kaya naman, sabay kaming makikinig nung lahat ng album ni Jolina.

FRANCE

Oh, wag kang masyadong excited. Baka hindi matuloy.

KRIS

Wag ka ngang kontra bulate dyan.

FRANCE

Nagpapaalala lang. I’m just performing my responsibility as your best friend.

KRIS

Bes, sa tingin mo ba liligawan na niya ko?

FRANCE

Ha?

KRIS

Or ako na ang gagawa ng first move?

FRANCE

Hindi mo pa ba nagagawa?

KRIS

Para kasing ang torpe-torpe ni Noel. Baka maunahan na siya nung iba ko pang manliligaw. Baka bukas-makalawa, hindi na siya ang type ko. Baka sa sobrang bagal niya, mainip ako. Baka—

FRANCE

Baka hindi ka naman nya talaga bet, Bes.

KRIS

Tingin mo?

FRANCE

Baka lang naman.

KRIS

Sinong gusto nya? Ikaw? (Walang sagot si FRANCE.) Sabi pa nya sa’kin kahapon, may surprise sya para sa’kin today. Magtatapat na kaya sya?

FRANCE

Nagtext sya kanina lang. Malamang, parating na yun.

KRIS

My god! Maganda pa ba ko? Mukha na ba kong haggard? Wala na kong powder, shit. Mapula pa ba yung lips ko. Baka may tinga pa ko. Pacheck nga, oh.

FRANCE

Wala. Wala naman.

NOEL

(Mula sa likod.) Hey, you two! Hello there!

KRIS

Oh! Hi Noel!

NOEL

Hi! Sorry, hindi ako nakasabay sa inyo mag-lunch.

FRANCE

Okay lang. Saglit lang din naman kaming kumain.

NOEL

Mag-meryenda na lang tayo later. 

KRIS

Sure. That would be great.

NOEL

So ano na’ng gusto nyo ngayon?

KRIS

Ikaw. Ay.

NOEL

I mean, saan na tayo tatambay?

FRANCE

May surprise ka daw for Kris?

NOEL

Ahh, yeah. 

KRIS

Really? Ang sweet naman.

NOEL

Actually, para sa inyong dalawa. (Iko-compose ang sarili.) Kris, I hope wag kang mabibigla sa ipagtatapat ko sa’yo. (Makahulugang titingin kay FRANCE.) I tried— I really tried to find the perfect time para ipaalam sa’yo ‘to. 

FRANCE

Wait! Naiihi ako. Mag-CR lang ako.

NOEL

(Pipigilan si FRANCE.) Pigilan mo muna yan. Ayun, I tried, pero I don’t think that there’s such thing as perfect time. So, ngayon na lang. Para special.

FRANCE

Sasabog na talaga! CR muna ko!

NOEL

Wait. Okay, here it is. (Titikhim.)  Kris… France, your best friend, and I, your new found friend, are actually celebrating our first month today. And we are so glad na ikaw yung kasama namin sa aming first monthsary. France, happy first monthsary! Pwede ka nang umihi.

(Tutugtog ang Paper Roses ni Jolina Magdangal. Lipat-tagpo. Lalabas ng entablado si NOEL. Maiiwang windang si KRIS habang bothered naman si FRANCE. Maglalabas ng bote ng alak si KRIS mula sa kanyang bag.)

KRIS

Ang ganda mo, Bes.

FRANCE

Bes, sorry. Hindi ko agad sinabi.

KRIS

Ang haba ng buhok mo. Muntik na kong matisod.

FRANCE

Hindi ko naman alam na mauuwi kami sa—

KRIS

Hindi ka ba nahirapang dalhin yan? Palagi tayong magkasama. Palagi akong nagkekwento sa’yo tungkol kay Noel. Yun pala—

FRANCE

Hindi naman dapat aabot sa—

KRIS

Siguro tuwang-tuwa ka na sa tuwing kinikilig ako, naiisip mo na ang tanga-tanga ko dahil hindi ko man lang napansin na wala ngang gusto sa’kin yung tao. Enjoy na enjoy kang naririnig yung pagtili ko kapag kinikilig ako, tapos bigla mo kong hihiritan na wag akong umasa dahil baka masaktan lang ako. Ang laki kong gaga.

FRANCE

Alam mo namang hindi totoo yang mga naiisip mo.

KRIS

Anong totoo? Ikaw na kaibigan ko simula pagkabata, na pinagkatiwalaan ko na ng lahat, maliban sa virginity ko, sasaksakin lang pala ko sa likod. Bading ka nga!

FRANCE

Bes, masyado ng masasakit yang mga binibitiwan mong salita.

KRIS

Totoo naman, eh. Masakit kasi totoo. Bakit, hindi ka ba bading? Hinawa mo pa si Noel.

FRANCE

Excuse me, Bes. Siya ang lumapit.

KRIS

Ayy! Ang ganda mo naman pala talaga, Bes.

FRANCE

Nagsasabi lang ako ng totoo.

KRIS

Mahirap nang maniwala kapag galing sa’yo.

FRANCE

Kaya nga nag-so-sorry na ko, e. Alam ko naman na masasaktan ka pero pinili kong maging duwag. Alam ko yun.

KRIS

Eh, kung alam mo, bakit sumige ka pa rin?

FRANCE

Eh, ang gwapo nya eh.

KRIS

Malandi ka. Mas malandi ka sa’kin.

FRANCE

Bes, pwede naman natin siyang paghatian. Hindi naman ako madamot.

KRIS

Gaga ka. Gagawin mo pa kong kabit.

FRANCE

Eh, hindi siya kumakain ng Mediterranean cuisine, eh.

KRIS

(Matatawa tapos ay seseryoso ulit.) Nag-sex na kayo?

FRANCE

Anu ba, Bes.

KRIS

Wag ka ngang maarte. Sagutin mo, nag-sex na ba kayo?

FRANCE

Ano ba namang tanong yan, Kris? Kilala mo naman ako. Hindi ako basta-basta kumakain ng pagkaing hindi ko alam ang luto. Ayoko nang sinasakitan ng tiyan. Kaya — thrice pa lang.

KRIS

Thrice your face! One month na kayong mag-on, tatlong beses pa lang kayong nag-aano?! Huwag mo nga akong inaano.

FRANCE

Three times pa nga lang.

KRIS

(Maiiyak.) Buti ka pa. Samantalang ako, wala man lang akong natikman.

FRANCE

Wag ka nang umiyak. Ikekwento ko na lang sa’yo yung lasa. Anong part of the body ba?

KRIS

(Maiiyak nang mas malakas.) Hayop ka, Bes. Mga animal kayo.

FRANCE

Huy, tahan na. Di ba dapat nga masaya ka para sa best friend mo?

KRIS

(Manggigigil.) Kundi lang kita kaibigan, kinalbo na kita.

FRANCE

Kris, sana maging masaya na lang tayo para sa isa’t isa. Hindi na tayo high school para pag-awayan pa natin ang lalaki. Hindi naman ako papayag na masira yung friendship natin dahil lang kay Noel.

KRIS

So hihiwalayan mo na siya?

FRANCE

Hindi. Ang ibig kong sabihin—

KRIS

Oo na! Gets ko naman. Kahit naman ako di ko ipagpapalit sa heartache yung pinagsamahan natin.

FRANCE

Mabuti.

KRIS

Wag mo syang papaiyakin, ha.

FRANCE

Siya kaya ang sabihan mo na wag akong papaiyakin.

KRIS

Mag-condom kayo, ha.

FRANCE

Hoy, tama na nga yang alak. Kung anu-ano nang lumalabas sa bibig mo.

KRIS

Minsan, threesome tayo.

(Maririnig ang Chuva Chu Choo ni Jolina Magdangal. Lipat-tagpo. Minumungkahi na magbago rin ang ilaw. Ang mga sumusunod na tagpo ay buhat ng maraming alaala ng mga tauhan. May laya ang direktor sa kung paano itatanghal ang mga eksena.)

KRIS

(Nagsusulat sa diary.) Simula third year college, hindi na naghiwalay sina France at Noel. Madalas, where France is, Noel is. And vice versa.

FRANCE

Noong una, natakot akong maging out ang relationship namin. Ayokong may masabi ang ibang tao na makakasakit sa’ming dalawa, lalo na kay Noel.

NOEL

Maraming nagulat nang malaman nilang boyfriend ko si France. Sabi ng mga dati ko ng kaibigan, hindi na sila nabigla dahil sa panahon ngayon, ruler na lang ang straight sa mundo. Sabi ko naman, I’m just trying to enjoy the wonders of this world. Isa na dun si France.

KRIS

Medyo matagal bago ko natanggap na bi o bading o kung anupaman si Noel. Hindi kasi kagaya ni Bes na buong buhay ko nang kilala, umasa ako na baka curious lang talaga si Noel.

FRANCE

Maraming gustong malaman si Noel tungkol sa same sex relationship. Matagal na raw siyang nakakaramdam ng attraction sa mga lalaki pero sa’kin niya piniling makipag-relasyon dahil ramdam niyang kaya ko siyang imulat sa mundong ngayon pa lang niya papasukin.

NOEL

Wala naman akong pakialam sa gender. Basta alam kong nakatagpo ako ng isang tao who really care about who I am, regardless the established norms of the society.

KRIS

Ang gaga ko lang dahil kahit after their 2nd monthsary, sinubukan ko pa ring ligawan si Noel. Hindi ko rin alam kung paano ko yun gagawin nun. Kaya dinaan ko sa diskarteng high school.

FRANCE

Naloka ko nung religiously ay tinutulungan ni Bes si Noel sa mga papers at homeworks. Tapos may mga kung anu-anong text messages na pinapadala na finoforward naman sa’kin ni Noel.

NOEL

Sumasagot naman ako kay Kris ‘pag nagtatanong sya ng “Anong gawa mo?” or “Nag-lunch ka na po?”. Pinapabasa ko ang mga text na ‘to kay France. Prinomise kasi namin sa isa’t isa na sana as much as possible, wag kaming magtatago ng secrets.

KRIS

Ipinagdasal ko na sana bumuka ang lupa at lamunin na ako nang buong-buo nung ifinorward sa’kin ni Bes lahat ng text ko kay Noel. Nung sunod na magkita kami, sinigawan niya ko sa kalsada nang sobrang lakas.

FRANCE

Haliparot kang bestfriend! (Tawa.) Balak mo pang sulutin ang jowa ko. Sinabi ko na sa’yo na hindi siya mahilig sa Mediterranean delicacy.

NOEL

Maraming babae pa ang nasaktan namin ni France. Majority sa kanila, hindi namin kilala. Malalaman na lang namin kay Kris na may na-basted kami kapag nakakasagap siya ng tsismis sa iba.

FRANCE

Hindi ko sigurado kung nalaman na ba ng buong campus na kami ni Noel. Ang sigurado ko lang, pareho naming hindi kayang aminin sa mga pamilya namin na boyfriend namin ang isa’t isa.

KRIS

At kahit hindi nila palitan ang kanilang FB relationship status, ramdam naman nilang dalawa na alam ng family nila kung anong meron sila.

FRANCE/NOEL

Pero hindi kailanman kami umamin.

FRANCE

Hindi na rin siguro kailangan. Bata pa lang ako ay alam na ng parents ko na mas gusto kong maging muse kesa escort.

NOEL

Wala akong kailangang aminin dahil wala naman akong idine-deny.

KRIS

Naging maayos ang takbo ng relasyon nilang dalawa kahit pa hanggang makatapos kami ng college.

FRANCE

Kung babalikan ang mga memorable moment na pinagsaluhan namin…

NOEL

Meron akong nakahandang listahan…

KRIS

A Round Up of the Most Unforgettable and Remarkable Million Dollar Moments of France and Noel!

NOEL

Let me start dun sa one of the most recent. Hatinggabi yun ng 43rd monthsary namin. Graveyard shift ako kaya hindi ko siya makakasamang sumalubong sa monthly celebration namin.

FRANCE

Yun ang akala niya. Pero dahil hindi ako mapakali na hindi ko siya kasama ng 12 midnight, pinuntahan ko siya sa opisina niya.

NOEL

Buti na lang, sumakto sa break ko yung pagdating ni France. May dala siyang kape at blueberry cheese cake para sa’ming dalawa. Sabi ko, sa baba ng office na lang namin kainin.

       FRANCE

Pero sa halip na bumaba, umakyat kami sa rooftop ng building. May ilang mga nakatambay pero masyadong romantic ang setting para mapansin pa namin sila.

NOEL

Kailan ka kaya mauubusan ng ideas for surprises?

FRANCE

Bakit? Sawa ka na ba?

NOEL

Hindi. I’m actually wondering kung paano mo ko nasusurpresa kahit alam ko na na may gagawin ka to make every moment special. (Walang sagot si FRANCE.) Salamat sa kape at sa cheesecake.

FRANCE

Salamat sa pag-appreciate sa mga kaya kong ibigay. (Hahalikan ang kaliwang kamay ni NOEL.)

KRIS

Nung birthday ni France last year, humingi ng tulong sa’kin si Noel para sa gift na pwede niyang ibigay kay France. Knowing my bestfriend, hindi yun mahilig sa materyal na bagay.

NOEL

So I decided na siya naman ang bigyan ko ng surprise.

KRIS

Pinabili ko si Noel ng mga glow in the dark na stars. Tapos, habang rumaraket si France sa isang event sa QC, pumunta kami sa bahay nila at nagpaalam sa nanay niya na may plano kami for his birthday.

NOEL

We invaded his room at idinikit namin sa ceiling yung mga glow in the dark. Pag-uwi niya after our dinner, nakita niya ang greetings sa kanya ng mga bituin.

FRANCE

(Over the phone.) Baliw ka. Pano kung pumasok dito sa kwarto si nanay?

NOEL

E, di nalaman na niya kung gaano kita kamahal.

FRANCE

Salamat. Ngayon lang ulit ako tumitig sa ganito kadaming stars.

NOEL

Ako, palagi kong nakikita ang langit kapag tinitingnan kita.

KRIS

Galing kami sa isang late night inuman nung tuparin ni France ang isa sa mga long time frustration ni Noel.

FRANCE

Natawa ako nung sabihin niya sa amin ni Kris na never pa niyang na-experience na maglaro sa playground.

NOEL

Pero totoo yun. Never akong pinayagan na magpunta o lumapit man lang sa playground. Baka daw kasi mahawa ako ng kung anong sakit.

FRANCE

So instead na dumiretso kami ng uwi sa kanya-kanya naming apartment, dinala ko sila sa isang preschool malapit sa campus.

KRIS

Sayang, walang slide dito.

FRANCE

Sige, next time, dun tayo sa may slide at monkey bars.

NOEL

Next time, ako naman ang magtutulak ng swing mo.

FRANCE

Hindi na kailangan. Matagal naman na akong nahulog sa’yo.

KRIS

Tang ina nyo!

(Tatawa sina KRIS at NOEL.)

KRIS

Kapag nakikita ko kung gaano sila kasaya, naiisip ko na baka nga may happy ever after para sa tulad nila.

FRANCE

Sinabi ko kay Noel ang takot na naramdaman ko nung naisip ko na baka isang araw, marealize ko na kaya ko nang magsettle sa aming dalawa.

NOEL

Mas natakot ako nun dahil hindi ko pa naisip ni minsan na magiging panghabambuhay ang fairytale na meron kami.

FRANCE

Sinabi ko sa kanya na hindi ko inaalis sa mga pangarap ko na baka balang araw, kami na nga ang para sa isa’t isa.

NOEL

Hindi ko sinabi sa kanya na wag muna siyang mag-isip nang ganun kalayo dahil baka hindi ko kayang makasabay sa mga binubuo niyang pangarap para sa amin. Hindi ko sinabi kay France dahil baka masaktan siya.

KRIS

Sa akin sinabi ni Noel ang lahat. Lahat ng hindi niya masabi kay France tungkol sa relasyon nila, sa akin niya ipinadadaan.

FRANCE

Marami na kaming naging away at di pagkakasundo ni Noel pero we tried our best na ayusin ang anumang gusot na dumating.

NOEL

We tried to make it work because we believe that our relationship will still work. Pareho kaming nagtrabaho, pareho naming inilaban ang bagay na para sa ilan ay talunan na sa simula pa lang.

KRIS

Knowing the two of them made me believe na nangyayari sa totoong buhay ang mga ending sa pelikula ni Jolina. I prayed for their happy ending.

NOEL

Pero walang pelikula sina Marvin at Jolina na walang major conflict na magpapabago sa takbo ng kwento.

(Lalabas sina NOEL at KRIS. Maririnig ang magulong reception ng radyo na unti-unting lilinaw. Papailanlang ang boses ni PAPA JACK sa kanyang programa na True Love Confessions. Makikita si FRANCE sa kaliwang bahagi ng entablado, may hawak na telepono.)

PAPA JACK

It’s 11:15, mga kabisyo. Malakas pa rin ang ulan sa labas kaya naman manong taxi driver, ingat-ingat sa pag-drive. Kayo naman dyan mga kabisyo, tuloy lang ang pakikinig sa ating programang TLC. Our final caller is on the phone. Si France ng Fairview. Hello, France. Magandang gabi.

FRANCE

Good evening, Papa Jack.

PAPA JACK

Oh  France, ba’t parang paos ka na agad?

FRANCE

Malamig lang talaga, Papa Jack.

PAPA JACK

Ganun ba? Bakit nasa France ka ba, France? O baka naman giniginaw lang ang malamig mong puso.

FRANCE

Ganun na nga siguro.

PAPA JACK

Oh, di bale. Paiinitin natin yan ngayong hatinggabi. Handa ka na bang ibahagi ang kwento mo sa’min, ha, France?

FRANCE

Ready na po.

PAPA JACK

Oh, siya sige, tira!

FRANCE

Ako po si France. Bading po ako. At nandito ako para i-share yung kwento ko hoping na after doing this, mas marealize ko kung ano ang solusyon sa problema ko. 

(Maririnig ang malakas na party music at ang hiyawan ng mga nag-iinuman at nagsasayawan. Sa kanang bahagi ng entablado, makikitang nakaupo sa sahig sina NOEL at KRIS, umiinom ng beer, parehong may tama na.) 

NOEL

‘Tang ina talaga. Yung mga kasabayan natin, may mga negosyo na, o kaya naman ilang ulit nang na-promote. Ikaw ang bongga na nung studio mo. Eh, ako? Wala. Ganto pa rin.

KRIS

Nagtatrabaho ka naman, ah. 

NOEL

Call center? Trabaho ba yun?!

KRIS

Noel, ang labanan ngayon, employment. You should be grateful dahil hindi ka tambay. You’re earning. And not just earning. You’re earning big!

NOEL

Yeah, yeah… Puro pera, pera, pera.

KRIS

Eh, ano pa bang gusto mo?

NOEL

Marami! Maraming marami pa kong gusto. Itong call center, hindi ko ‘to gusto.

KRIS

More than 3 years ka na dyan, di ba?

NOEL

Tatlong taong pagtitiis sa mga tamad na Amerikano. Nakakabobo.

KRIS

Wag mo ngang sabihin yan.

NOEL

Eh, anong sasabihin ko? Alleluia? Alleluia kasi magaling na agent ako, kahit na hindi na ako nakatuloy sa pagma-masters, at least magaling akong mag-English! You know what I’m saying?

KRIS

Pwede ka pa rin namang mag-aral.

NOEL

Talaga? Papaaralin mo ba ko?

KRIS

Makakaipon ka din. May scholarship naman. Wag kang mag-lose ng hope.

NOEL

Wow, conyo mo naman. Agent ka din?

(Tatawa si KRIS.)

NOEL

Hay, tang inang buhay ‘to, nakakadurog ng bayag!

KRIS

(Lalong matatawa.) Wala ka naman nun dati pa.

NOEL

Ano’ng wala? May bayag ako. Durog lang pero meron pa rin. Gusto mo pakita ko sa’yo. Ano?

KRIS

Shut up.

(Saglit na tatahimik ang dalawa habang patuloy sa pag-inom si NOEL.)

KRIS

Alam ba ni France yang mga angst mo sa buhay?

NOEL

Angst talaga, ha. Walang pakialam yun sa angst ko. Busy yun sa pagfi-freelance niya.

KRIS

Eh, trabaho naman kasi niya yun.

NOEL

Whatever. Eh di siya na ang masaya sa trabaho niya.

KRIS

Hoy, tumigil ka na nga dyan.

NOEL

Totoo naman, eh. Lahat naman ginawa ko na, pero wala pa rin. Ni hindi ko nga maamin sa bahay na may boyfriend ako, eh.

KRIS

Alam na naman nila.

NOEL

Pero hindi ko pa rin inaamin.

KRIS

Eh, bakit ba ayaw mong aminin?

NOEL

Kasi nga durog yung balls ko. Tsaka alam ko nang sasabihin ng mga yun sa’kin.

KRIS

Paano mo alam, eh, hindi mo pa nga sila naririnig.

NOEL

Ayaw nila ng bakla. Nasusuka sila. Hindi naman sila umiinom ng alak pero nasusuka sila. Labo, no? Gusto nila magkapamilya ako. Gusto nila akong magkaanak. Gusto nila maging doctor ako. Gusto nila yumaman ako. Gusto nila, maging ganito ako. Maging katulad ako ni ganito. (Mababasag ang boses.) Eh, paano ko magiging ganun, eh, pasan ko sila lahat? Paano ko magagawa yung gusto ko at yung gusto nilang maging ako kung ang dapat kong unahin ay yung mga gusto nila para sa sarili nila?

KRIS

Noel—

NOEL

Sige nga, sabihin mo sa’kin, Kris. Pa’no? Posible ba yun? Pwede bang kalimutan ko na lang sila para maaalala ko naman yung sarili ko?

KRIS

(Aaluin si NOEL.) Noel, magiging okay din ang lahat.

(Magkakatitigan sila. Matitigilan saglit, tapos ay hahalikan ang isa’t isa sa labi. Tutugtog ang Laging Tapat ni Jolina Magdangal, kasunod ang boses ni PAPA JACK. Maririnig din na humihikbi sa telepono si FRANCE.)

PAPA JACK

Ay talaga namang napakahirap ng sitwasyon ng kaibigan nating si France, mga kabisyo. Hay. This is really hard for someone like you na nagtiwala at nagmahal nang lubos. Pero France, iba man ito sa mga pangkaraniwang kwento na naibahagi na sa akin ng ating mga tagapakinig, naniniwala ako na sa dulo ng gusot na ito, may solusyon pa rin para malampasan mo ang problema. Hello, France? Andyan ka pa ba?

FRANCE

Yes po, Papa Jack.

PAPA JACK

Eh, wag kang magngunguyngoy dyan. Makinig ka. Kaya ka nga tumawag sa’kin di ba?

FRANCE

Opo.

PAPA JACK

Oh, ang sinasabi ko sa’yo, alam ko— or I mean, kahit papaano ay nararamdaman ko ang sakit na pinagdadaanan mo ngayon. At sa ganyang sitwasyon, didiretsahin kita, ang tanging magagawa mo ay… sumuko. Alam ko mahal na mahal mo si Noel at magiging araw-araw na pahirap sa’yo ang isiping kahit mahal ka rin niya ay ang bestfriend mo ang siyang makakasama niya habambuhay. Ang sakit marinig nun no, France?

FRANCE

Opo.

PAPA JACK

Pero kailangan mong marinig nang paulit-ulit hanggang sa marealize mo ang totoo. Hindi ko kino-condemn ang mga tulad ninyo. Mahal ko kayo. Pero harapin natin ang katotohanan na ang lipunan natin ay hindi kumikilala ng happy ending ng dalawang prince charming. More importantly, kailangan mong tanggapin, France, na wala nang saysay ang ilaban mo pa ang kung anumang meron kayo ni Noel. Tanungin mo ko kung bakit?

FRANCE

Bakit, Papa Jack?

PAPA JACK

Dahil sumuko na si Noel. France, walang kapupuntahan ang pag-ibig kung isa na lang ang nagdadala. Kung isa na lang ang nakikipaglaban.

(Papailanlang ang chorus ng Laging Tapat. Lipat-tagpo. Nasa isang bar sina FRANCE, KRIS, at NOEL. Magpapalitan lang ng makakahulugang tingin ang tatlo habang pasalit-salit na umiinom ng beer mula sa bote o baso. Tatagal ito nang ilang sandali.)

FRANCE

(May tama na.) Sabi sa Wikipedia, beer is the world’s most widely consumed alcoholic beverage. It is the third-most popular drink overall.

KRIS

After water.

NOEL

And tea.

FRANCE

Yeah. After water and tea. Pero bakit kaya third lang? Ganun na ba kadami ang tea shop sa mundo?

KRIS

Kasi hindi naman lahat ng tao umiinom ng alak.

FRANCE

Hmm. Sino na nga lang ba ang umiinom?

NOEL

Yung mga may sine-celebrate. O kaya naman minsan, just for the sake of it. Or—

FRANCE

O kaya naman yung may pinagdadaanan. Di ba? (Tatango ang dalawa.) Bakit ba tayo umiinom? A, B, or C?

(Katahimikan. Magpapalitan lang ng makakahulugang tingin ang tatlo habang pasalit-salit na umiinom ng beer mula sa bote o baso. Tatagal ito nang ilang sandali.)

FRANCE

(Malakas ang boses.) C. The answer is C. Tama ba?

NOEL

France, lasing ka na. Tama na yan.

FRANCE

Bakit ba naglalasing ang isang tao? A, B, or C?

NOEL

Please, France. Wag dito.

FRANCE

Anong wag dito? Bakit? Nahihiya ka na lasing ang boyfriend mo?

NOEL

Hindi sa ganun.

FRANCE

Eh, ano? Baka naman nakalimutan mo na nang tuluyan na boyfriend mo ko, at boyfriend kita. At bestfriend ko yung binuntis mo.

KRIS

Bes, please. Wag namang ganyan. Pag-usapan natin nang maayos.

FRANCE

Akala nyo ba gusto ko kayong kausapin? Mga traydor.

NOEL

Tara na. Umuwi na tayo.

FRANCE

Bitiwan mo nga ako! (Iko-compose ang sarili, mayamaya ay maiiyak.) Hanggang kanina, hinihintay ko yung punchline ng joke nyo. Hindi kasi nakakatawa. Hindi nyo ba babawiin? Nasan yung chos? Yung charot, yung keme lang sa dulo? Sinong magsasabi nun sa inyo? Wala? So hindi talaga joke? Totoo. (Iinumin ng straight ang beer sa harap.)

NOEL

(Pipigilan si FRANCE.) France, wag nating daanin sa ganito.

FRANCE

Alam nyo bang definition ng best friend at ng boyfriend? Common knowledge naman yun di ba? Ang tagal na nating magkaibigan, Kris. Sabi mo pa sa’kin nun, you would take a bullet for me, because it would be too painful for you to watch me get hurt. Naintindihan mo ba yun nung sabihin mo sa’kin? Binaril mo ko, Kris, eh. Binaril mo ko sa likod.

KRIS

(Umiiyak.) Hindi ko sinasadya, Bes.

FRANCE

Wag mo kong tawaging Bes. Ang totoong bestfriend, magpapahiram ng matris sa bakla niyang kaibigan, hindi nanakaw ng chance para siya ang maanakan.

NOEL

France, that’s enough.

FRANCE

It isn’t, Noel. Ikaw, alam mo ba kung ano ang definition ng boyfriend?

NOEL

Wag mo kaming ikahon sa depinisyon mo o ng google ng kung sino at ano kami sa’yo.

FRANCE

Wow. Well said. Pero just to make a point, a boyfriend is a regular male companion, a significant other in an exclusive romantic relationship. Boyfriends tayo di ba? Bakit tinulungan mo siya sa pagbaril sa’kin? Bakit pinaputukan mo ang bestfriend ko?

NOEL

Dahil ang boyfriend ay para sa girlfriend.

FRANCE

Putang ina mo! (Susugod at susuntukin si Noel.)

(Susubukang umawat ni KRIS. Pupunta sa isang tabi si NOEL.)

KRIS

France, hindi ko ipapalaglag ang bata.

FRANCE

Wala namang nag-uutos sa’yo na ipalaglag yan. Walang kasalanan ang bata. Wag nyo siyang idamay sa problema.

KRIS

France, ilang beses na kong sumubok na humingi ng tawad sa’yo.

FRANCE

Nagbibilang ka?

KRIS

Hindi. Hanggang kailan ka ba magagalit sa’kin?

FRANCE

Kapag alam ko na ang tamang rason para patawarin ka.

KRIS

Ako naman ang magku-quote ng linya natin noon. Hindi ba sabi mo hindi mo hahayaang masira yung samahan natin ng dahil lang kay Noel?

FRANCE

Wag kang magtanga-tangahan, Kris. Hindi ito katulad nang dati. Ikakasal kayo, magkakapamilya. Iiwan ninyo ko.

(Maiiyak si KRIS.)

FRANCE

Wag kang umiyak. Baka isipin nila kung anong ginawa ko sa’yo. (Patlang.) Wala ka ng sasabihin? Kasi kung wala na, ako naman ang magtatanong. Masarap ba ang boyfriend ko?

KRIS

France, sana alam mo kung gaano ko pinagsisihan—

FRANCE

Hindi ako maawa, Kris. Dahil kahit gaano ka pa magsisi, hindi mo na maibabalik sa’kin si Noel.

KRIS

Hindi ko gustong kunin siya sa’yo. Hindi ko siya inagaw.

FRANCE

Hindi nga. Wala ka namang ginawa, eh. Malas ko lang dahil babae ka, lalaki ako. (Maiiyak na din, pero susubukang pigilan.)

KRIS

Kung pwede ko lang ibigay sa’yo ang baby, gagawin ko.

FRANCE

Pero alam kong hindi mo yun gagawin. Dahil nararamdaman ko, may lugar diyan sa puso mo na ginustong mangyari ang lahat ng ‘to.

KRIS

Bes—

FRANCE

Kung hilingin kong palayain mo si Noel after mong manganak, papayag ka ba?

KRIS

Hindi papayag ang pamilya ko.

FRANCE

Kahit kami na lang ni Noel ang umako sa bata?

KRIS

France, anak ko din ang batang ‘to.

FRANCE

Hihiwalayan mo ba siya pagkatapos ng ilang buwan? O ng ilang taon?

NOEL

France, please stop.

KRIS

Hindi ko alam.

FRANCE

Masaya ka na ba na nakuha mo na siya?

KRIS

Alam mong hindi ko siya makukuha sa’yo.

FRANCE

Mahal mo ba siya? (Hindi agad sasagot si KRIS, iiyak lang.) Mahal mo ba siya? (Tatango si KRIS.)

(Susubukang yakapin ni KRIS si FRANCE pero papalag ito. Lalabas ng entablado si KRIS.)

FRANCE

May mali ba?

NOEL

Mali saan?

FRANCE

Sa’kin.

NOEL

Walang mali sa’yo.

FRANCE

May kulang ba?

NOEL

France, tao tayo. Alam mong hindi nakukuntento ang tao.

FRANCE

Ano’ng kulang?

NOEL

Hindi ko kayang sagutin.

FRANCE

Noon mo pa ko niloloko?

NOEL

Hindi. At hindi kita niloko.

FRANCE

Ano’ng tawag mo sa nangyari?

NOEL

France, alam mong aksidente—

FRANCE

Aksidente? Ano yun, nadulas siya sa balat ng saging tapos natumba, tapos nahubad yung damit niya, tapos nadulas ka din, at nagkataong wala kang suot kaya aksidenteng pumasok ang titi mo sa pekpek niya?

NOEL

Hindi ganyan kababaw ang kilala kong France.

FRANCE

Hindi rin ganun kababoy ang kilala kong Noel.

NOEL

Uulitin ko, hindi namin sinasadya.

FRANCE

Sinong nag-initiate?

NOEL

Hindi ko alam. Ano bang tanong yan?

FRANCE

Bakit di mo pinigilan?

NOEL

Lasing ako.

FRANCE

Tangina naman, Noel. Ilang taon na tayong nalalasing at nagdyudyug pero pagkagising natin kabisado mo ang lahat nang nagyari.

NOEL

Iba ‘to.

FRANCE

Gaano kaiba? Iba dahil babae siya? Iba dahil totoo yung boobs niya? Iba dahil hindi siya pwet at bibig lang? Paanong iba, Noel? 

NOEL

You’re not listening.

FRANCE

You’re not even answering my questions.

NOEL

France, hinarap kita dahil nagbabakasakali ako na after ng pag-uusap na ‘to, maiintindihan mo ko at matatanggap natin pareho ang sitwasyon.

FRANCE

Paano kung hindi?

NOEL

Wala na kong magagawa. Nangyari na. Hindi ko kayang ibalik ang oras para itama ang mga pangyayari ayon sa kagustuhan mo.

FRANCE

Wow. Kagustuhan ko. Kagustuhan ko lang?

NOEL

Alam mong hindi ko hiniling na malagay ako sa ganitong gulo.

FRANCE

Eh, bakit hinayaan mong magkaproblema?

NOEL

Paulit-ulit tayo, France.

FRANCE

Uulit-ulitin ko hanggang malaman ko kung ano ang totoo.

NOEL

Hindi. Uulit-ulitin mo hanggang sa marinig mo ang gusto mong sabihin ko.

FRANCE

(Matatahimik, pipigilan ang pag-iyak.) Mahal mo ba ko? 

NOEL

Hindi na magbabago yun.

FRANCE

Papanagutan mo ang bata?

NOEL

Anak ko yun, France.

FRANCE

Papayag kang magpakasal?

NOEL

Para sa buhay ng bata.

FRANCE

Paano na tayo?

NOEL

Hindi naman ako mawawala, France.

FRANCE

(Unti-unting magbe-breakdown.) Sinungaling ka. Ang dami-dami nating pinangako sa isa’t isa tapos wala naman pala dun ang matutupad. Ikaw pa mismo ang nagsabi mangarap tayo nang magkasama para magkasama din nating tutuparin lahat ng yun. Anong klaseng pangako naman yun?

NOEL

France, alam kong alam mo kung gano kahirap din para sa’kin ‘to. At kahit anong desisyon ang piliin ko, o piliin natin, may masasaktan at may masasaktan. Walang madaling paraan.

FRANCE

Paano kung di ka na lang pumayag magpakasal?

NOEL

Ayokong isakripisyo ang buhay ng anak ko.

FRANCE

Kaya tayo ang isasakripisyo mo?

NOEL

Kahit ano pa’ng mangyari, darating din tayo sa ganito, France.

FRANCE

Hindi yan ang sinabi mo sa’kin dati. Ang sabi mo noon, kahit gaano pa ‘to ka-mali sa paningin ng iba, hangga’t nararamdaman natin na ito ang tama, hindi tayo magpapadikta sa kanila. Ang hina mo naman pala.

NOEL

Mas malakas sila sa’ting dalawa. Pag-ibig lang ang meron tayo.

FRANCE

Hindi ko kaya, Noel. Ayokong umalis ka.

NOEL

I’m not leaving.

FRANCE

But you’re not staying either.

NOEL

Tulungan na lang natin ang isa’t isa na magpatuloy.

FRANCE

Buntisin mo na lang din ako.

NOEL

Kung pwede lang.

(Lalong maiiyak si FRANCE. Mahigpit silang magyayakap. Papailanlang ang Kapag Ako ay Nagmahal ni Jolina Magdangal. Lipat-tagpo. Ang susunod na bahagi ay tagpi-tagping monologo na bibigkasin ng mga tauhan habang sila ay binibihisan para sa kasal. Muli, may laya ang direktor sa kung paano i-eexecute ang eksena.)

NOEL

Kagaya sa araw ng ating binyag, sinisindihan ang kandila sa kasal upang magsilbing liwanag ni Kristo sa kabanalan ng seremonya ng pag-iisang dibdib.

FRANCE

Dalawa para sa dalawang pusong maglalakbay sa hindi laging maliwanag na daan ng buhay.

NOEL

Puti ang kandila, sagisag ng dalisay na tanglaw ng Panginoon.

FRANCE

Sinisindihan ang kandila para maging tanglaw sa harap ng ikakasal, habang naiiwan sa likod ang walang tangan na kandila, unti-unting lalamunin ng dilim. Kung umiyak man siya, wala nang makakakita. Wala nang makakaaninag dahil ang lahat ay nasilaw na sa liwanag ng kandila.

KRIS

Isinusuot ang belo sa mag-iisang dibdib upang madamitan sila hindi bilang dalawang tao, kundi bilang dalawang nilalang na pinag-isa.

NOEL

Puti din upang maging simbolo ng kalinisan at kadalisayan. Malinis na puting tela na kukumot sa mag-asawa.

FRANCE

Magsusuot din ako ng belo. Pero hindi kulay puti, kundi itim. Simbolo ng pagluluksa.

NOEL

Ibibigkis ng puting tali ang belo upang mas humigpit ang pagtataling puso ng dalawang taong nakaharap sa altar.

KRIS

Pansinin ang nabubuong hugis ng walang hanggan sa pagpapatong ng tali sa balikat ng ikinakasal. Nangangahulugan lamang ng hanggang walang hanggan na pagsasama, sa ilalim ng basbas ng simbahan.

FRANCE

Walang hanggang lungkot ang parang lubid na sasakal habang pinagmamasdan ang kaganapan ng pagiging isa ng dating dalawa. Nangangahulugan lamang ng iyong walang hanggang pag-iisa dahil ang dating kasama ay ibinigkis na sa iba.

KRIS

Tatlumpong baryang ginto ang laman ng aras. Simbolo ng yamang iingatan ng mag-iisang dibdib.

FRANCE

Simbolo ng pagkakanulo ng kaibigan sa isa pang kaibigan. Kagaya ng ginawa ni Hudas kay Hesus.

NOEL

Aras na magsisilbing simula ng pagyabong ng dalawang kaluluwa sa tulong ng yaman na iipunin nila at pagtutulungang palaguin.

FRANCE

Aras na palaging magpapaalala na ang pag-ibig ay nabibili. Hindi lang ng pera, kundi ng takot na mawalan.

KRIS

Isinusuot ang singsing sa pang-apat na daliri mula sa hinlalaki sa kaliwang kamay dahil naniniwala ang mga tao na nandun ang ugat na direktang nakaugnay sa puso.

NOEL

Isinusuot ang singsing bilang tanda ng pangako ng mag-iisang dibdib na magsasama sila sa hirap at ginhawa, sa lungkot at saya, hanggang paghiwalayin ng kamatayan.

FRANCE

Isinusuot ang singsing upang habambuhay na ipamukha sa iba na hindi na basta-basta makukuha pa ang taong pinag-aarian. Kahit pa ang gustong kumuha ay ang tunay na nais niyang pag-alayan ng singsing.

(Dahan-dahang lalapit si FRANCE kay NOEL. Tititigan lang niya ito, habang nakamasid din si KRIS sa kanilang dalawa. Lalabas ng entablado si NOEL. Lalabas din ng entablado si FRANCE ngunit hindi sa kung saan lumabas si NOEL.)

(Magbabago ang ilaw. Lipat tagpo. Nakatayo si KRIS hawak ang sapatos na isusuot niya sa kasal. Tititigan niya ito habang bakas sa mukha ang di maunawaang emosyon. Hindi niya mapapansin ang pagpasok at paglapit ni FRANCE.)

FRANCE

Masyado bang mataas ang takong?

KRIS

(Magliliwanag ang mukha.) Bes—

FRANCE

Sorry, yan talaga yung pinakabagay sa gown mo, eh. I know kaya mong dalhin yan.

KRIS

(Yayakapin si FRANCE.) Akala ko hindi ka na talaga dadating.

FRANCE

Pwede ba naman yun, eh, ako ang designer ng kasal ninyo.

KRIS

Bes, hindi ko alam kung paano ako magsisimulang magpasalamat, o mag-sorry—

FRANCE

There’s no need, Bes. Sa tunay na magkaibigan, madalas, hindi kailangan ng paliwanag.

KRIS

(Yayakap ulit.) I miss you.

FRANCE

Wag ka ngang magdrama dyan. Anong tingin mo sa’kin, mudra mo? Ganda ko naman.

KRIS

Nag-usap na kayo ni Noel?

FRANCE

Hindi mo na dapat isipin yan. Araw ninyong dalawa ‘to, Bes. Gusto ko, maging masaya ang mga taong mahal ko.

(Yayakap ulit si KRIS.)

FRANCE

Nakakadami ka na ha. Baka mamaya ako pa ituro mong ama niyang nasa tiyan mo.

KRIS

Sira! Alam mo namang higit pa sa groom ang turing ko sa’yo.

FRANCE

Kadiri ka!

KRIS

Seriously, Bes, thank you for being the best man of our lives. Next to God, next to our fathers.

FRANCE

Wow, first honorable mention. (Magtatawanan silang dalawa.)

KRIS

Teka, di ba dapat ang best man, nasa room ng groom?

FRANCE

Gaga. Ayaw mo ba nito? Eh, di kung nandun ako, baka maghintay ka nang matagal sa altar.

(Magtatawanan sila nang mas malakas. Maririnig ang pagtunog ng kampana na naghuhudyat na may nagaganap na kasal. Saglit na magdidilim ang entablado. Sa muling pagliliwanag, makikita sa entablado sina FRANCE at NOEL, magkatabing nakatayo sa harap ng altar. Pormal ang kanilang suot na damit.)

NOEL

Uulitin ko, patawad.

FRANCE

Salamat.

NOEL

Hindi ko na hihilingin na maging masaya ka para sa’min.

FRANCE

Wala akong ibang hiniling kundi ang maging masaya ka.

NOEL

Uulitin ko, hindi kita niloko.

FRANCE

Alam ko. Salamat.

NOEL

Hindi ako, mawawala. Pangako.

FRANCE

Wag kang mangako. Dahil hindi ko rin maipapangako na hindi ako mawawala.

NOEL

Alam mo namang mahal pa rin kita, di ba?

FRANCE

Uulitin ko yung sinabi mo. Hindi yun sapat. Pero oo, alam ko.

NOEL

Wag mong kakalimutan yun.

FRANCE

Maaalala ko rin yun kapag nakalimutan ko na ang sakit.

NOEL

Tumawa ka ulit. Yung malakas. Gaya ng dati.

FRANCE

Hindi na pwede. Hindi na maibabalik ang dati.

NOEL

Basta tumawa ka.

FRANCE

Sige, gagawin ko. Baka sakaling hindi na ko maiyak.

NOEL

Magnininong ka, ha?

FRANCE

Matagal pa ang siyam na buwan. Malay mo makunan. Joke.

NOEL

I love you, France.

(Tuluyang maiiyak si FRANCE.) 

NOEL

Salamat sa lahat. Maraming salamat.

FRANCE

Ganito ang pinangarap kong kasal para sa’tin. Natupad na. Hindi nga lang para sa’ting dalawa.

NOEL

Sana pwede nating angkinin. (Kukuhanin niya ang kaliwang kamay ni FRANCE. Mahigpit silang mag-ho-holding hands.)

FRANCE

(Iaabot ang mga singsing.) Heto yung mga singsing. Bago ninyo sila gamitin, gusto kong malaman mo na hindi man ako ang magsusuot nyan sa’yo, I want you to know that today, I take you to be my greatest love. To have and to hold, from this day forward, for better, for worse, for richer, for poorer, in sickness or in health, to love and to cherish ’till death do us part.

(Hindi makakasagot si NOEL, patuloy lang ang pag-iyak habang papalapit na lumalakad si KRIS. Magtitinginan ang tatlo. Yayakapin ni FRANCE si KRIS. Tapos ay yayakapin ni FRANCE si NOEL. Lalapit sa altar sina KRIS at NOEL. Dahan dahang lalakad palayo si FRANCE.)

TABING


This literary piece is part of Katitikan Issue 4: Queer Writing.

By Eljay Deldoc

Si Eljay Castro Deldoc ng Hagonoy, Bulacan ay isang mandudula, direktor, at guro. Siya ay miyembro ng Tabsing Kolektib, The Writers Bloc, at Quiapo Collective. Ang kaniyang mga dula ay naitanghal na sa CCP, sa iba't ibang unibersidad sa Maynila at Mindanao, sa Saudi Arabia, California, at Canada.

Leave a Reply

Your email address will not be published.

This site is protected by reCAPTCHA and the Google Privacy Policy and Terms of Service apply.