Paglawig

Mga Tawo 

ALBERT, 

CHRISTINE, 

UNANG AKTO 

Naay kama sa tunga sa entablado nga queen-size. Sa salog, naay pantalon, t-shirt, bestida, ug panti. Sa isigkakilid sa kama, naay mga kabinet na gagmay nga naay lampara nga amarilyo og siga nga nakapatong. Sa lampara dapit si ALBERT naay nakapatong nga bra. Anaa say usa ka tualya nga nakapatong sa kabinet dapit ni CHRISTINE. Anaay purtahan sa isigkatumoy sa entablado. Si ALBERT ug si CHRISTINE anaa aning maong kama. Sa sinugdanan, madunggan si ALBERT ug si CHRISTINE nga nag-agulo samtang madungog usab ang kinagiit sa kama. Palong pa ang suga sa entablado ani. 

ALBERT 

Ugh, ganahan ka ana? Huh? Ginoo ko, piste na lang. 

CHRISTINE 

Ugh, sige pa. Sige pa. Ayaw undangi. 

ALBERT 

Lami kaayo ka. Yawa! Ugh, hapit na ko. 

CHRISTINE 

Ugh, ayaw undangi. Pugngi sa. 

(Madunggan nga moutong og maayo si ALBERT 

ug moagulo siyag kusog. Mohilom ang tanan. 

Kalit nga madunggan mao ang kahangak na la 

ni ALBERT.) 

(Mosiga ang suga sa entablado ug makita nga 

si ALBERT gahukas ug gasandig sa ulohan sa 

kama, gipaningot ug gahangak, samtang si 

CHRISTINE kalmang gahigda, gahayang samtang 

ang iyang usa kakamot gahapuhap sa abaga ni 

ALBERT. Gitabonan ni CHRISTINE ang iyang 

kaugalingon sa pikas niya nga kamot nga 

gagunit sa habol sa kama.) 

Komosta ka diha? Kaya pa? 

ALBERT 

Ha? Oo, kaya pa. Pahulay ra ko gamay. 

(Mikab-ot si ALBERT sa kabinet aron mokuha 

og sigarilyo. Dagkotan niya.) 

Nakahuman ka? 

CHRISTINE 

(Galibog siyag unsay itubag.) 

U-um, huh? Oo, uy. Lami kayka modala god. Dako pa jod kaayo nang imoha. 

(Molingiw si CHRISTINE ug mopagawas sa 

iyang dila kay giluod siya.) 

ALBERT 

Mao jod to ang kinalamian nako nasinati, da. 

(Moagbay si ALBERT kang CHRISTINE.) 

Grabe. 

(Moaksyon si ALBERT og halok kang CHRISTINE 

apan managang si CHRISTINE.) 

(Mobagting ang selpon ni ALBERT. Mohunong 

si ALBERT og halok kang CHRISTINE. Iyang 

lantawon ang iyang selpon. Dayon susihon ni 

ALBERT si CHRISTINE, naniid sa reaksyon sa 

babaye.) 

CHRISTINE 

Itunol ko adto, bi. 

(Gitudlo ni CHRISTINE ang bra nga naa sa 

lampara. Iniglingi ni ALBERT aron kuhaon 

ang bra, magdali-daling molili si CHRISTINE 

sa selpon.) 

ALBERT 

Nara, o. 

(Itunol ni ALBERT ang bra. Magpaaron-ingnon 

dayong walay gibuhat nga lain si CHRISTINE. 

Dawaton ni CHRISTINE ang bra ug kuhaon usab 

niya ang tualya.) 

(Mobarog na unta padulong si CHRISTINE apan 

wala siya makapugong sa iyang kaugalingon 

nga mangutana.) 

CHRISTINE 

Kinsa to? Kadtong mitawag ba? 

ALBERT 

Wala ra man. 

CHRISTINE 

(Mobarog si Christine kilid sa kama.) 

Aw. 

(Magtapis siya samtang magpadayon silag 

estorya.) 

Pero ganahan ko adtong imo kong gi- 

(Gibutang ni CHRISTINE ang iyang kamot 

dapit sa iyang bat-ang.) 

Gikuan ba. 

ALBERT 

(Maulaw gamay si ALBERT.) 

Aw, tarong, uy. Nakat-onan ra pod na nako. 

CHRISTINE 

(Magpabiling magbarog si CHRISTINE kilid sa 

kama.) 

Huh, mao ba? Diin man sad na nimo nakat-onan? 

(Mangiyugpos si CHRISTINE sa iyang mga 

bukton ug tutokan niya si ALBERT.) 

ALBERT 

Gapaniksik ko ana, uy. 

CHRISTINE 

(Molakaw si CHRISTINE padulong sa purtahan 

sa wala nga bahin sa entablado.) 

Ah, mao na diay nay atong tawag ana ron? Dinhi gihapon nga SOGO ka gapaniksik ana? 

ALBERT 

Ambot nimo, uy. 

(Nahilom silang duha kadali. Kalit nga 

tuktokon ni CHRISTINE ang purtahan ug 

makuyawan si ALBERT. Padulong na unta 

niyang pagngon ang sigarilyo og dali-dali 

apan makabantay siya nga si CHRISTINE ra 

diay ang nanuktok.) 

(Molili si CHRISTINE gikan sa purtahan nga 

ang iyang ulo ray moguwa. Mokatawa siya.) 

CHRISTINE 

Pungtanon jod kaayo ka, uy. 

(Molakaw si CHRISTINE padulong sa kama pero 

mohunong siya sa tunga-tunga.) 

ALBERT 

Yawa man diay ka. Nag-unsa man sad ka sa CR? 

CHRISTINE 

Nag-ilis sa akong bra ug panti. Naunsa man sad ka god. Nganong manigarilyo man sad ka nga kabalo kang bawal? 

ALBERT 

Nganong magbuot ka nako? (Pinasuko.) Kita ka og bawal manigarilyo diha? 

CHRISTINE 

Bisan na, bawal man jod na. Diin man kong dapita nagbuot kuno bi? Nagbuot ba diay ko? 

ALBERT 

Nganong mangutana man sad kag nganong manigarilyo ko?

CHRISTINE 

Unya gabuot na diay na? Uroy og masakpan ka? Dakpon tang duha. Mapesbok ta? Masakpan jod nuon ka sa imong mga uyab. Mga kauban nimo sa paniksik. Usa pa makamulta ka, unya pabayron ko nimog apil? 

(pitik) 

(Molakaw si CHRISTINE paduol kang ALBERT ug 

kab-oton niya ang nawong ni ALBERT, 

nagpasabot siyang ipatunol ang sigarilyo.) 

Pahipaka kog gamay, bi. 

(Gidunol ni ALBERT ang sigarilyo ug gidawat 

kini ni CHRISTINE.) 

ALBERT 

Kusog kaayo mamadlong unya mohipak ra man diay. 

CHRISTINE 

Namadlong diay ko? 

ALBERT 

Unsa diay tawag nimo adto ganiha? 

CHRISTINE 

Wala man ko namadlong nimo. Pikon lang jod ka. 

(Wala tingi ni ALBERT si CHRISTINE og 

nagkuha na lang siya og lain nga sigarilyo. 

Nabantayan na kini ni CHRISTINE nga hapit 

na dagkoti ni ALBERT ang sigarilyo.) 

Hoy, naa pa man ni, o. 

ALBERT 

Tiwasa na lang na. 

CHRISTINE 

(Gahipak niyag dalidali.) 

Nara, o. Hipak ra gani tag gamay. 

ALBERT 

Hasola ani niya, uy. 

(Gidunol ni CHRISTINE ang sigarilyo. 

Gidawat kini ni ALBERT.) 

(Mohigda si CHRISTINE sa paa si ALBERT.) 

Nalipay kong nakakita nimo ron. 

CHRISTINE 

Mora lagi ka og karon pa? 

ALBERT 

Taudtaod na baya pod kong wala na makakita nimo. Pipila na pod ka adlaw nga gusto unta kong makigkita nimo. Hapit na gani ko moadto sa inyoha. 

CHRISTINE 

Karon pa man sad ko kalugar god. Imo na lang jod unta kong giadto sa balay. Paila-ila unta tika sa akong ginikanan. 

ALBERT 

Kaisog god nimo. Imo kaha kong ipaila-ila? 

CHRISTINE 

Malamang. Unya, mosugot kang ipaila-ila tika? 

ALBERT 

Ipaila-ila dayon ko, bi. 

CHRISTINE 

Dili na lang, uy. (Pitik.) Unsa man diay tuyo nimo nako nga imo na man jod unta kong pangitaon sa balay? 

ALBERT 

Kanang, nakahinuklog ko ba (Pitik.) nga… 

CHRISTINE 

Unsa man? ‘Storya na dayon. 

ALBERT 

Hunongon na nato ni. 

(Dili motubag si CHRISTINE ug mokab-ot 

dayon siya sa sigarilyo nga anaa sa kabinet 

dapit ni ALBERT. Ang iyang nawong mo bagi-d 

sa bat-ang ni ALBERT) 

(Moigking si ALBERT gamay.) 

CHRISTINE 

Unsa may dapat undangon? 

ALBERT 

Kini 

CHRISTINE 

Kining unsa? Wala na man say kita, di ba? Dugay na kaayo tong mga panahon nga kita. 

ALBERT 

Kanang kini ba 

(Molabyog ang iyang kamot sa tunga nila ni 

CHRISTINE.) 

CHRISTINE 

Unsa lagi nang ‘kiniha’? 

ALBERT 

Naa nakoy nailhan nga usa ka baye. Paminaw nakong siya na jod seguro ang para kanako. 

CHRISTINE 

Mibalik na man ta arong salidaha, uy. 

ALBERT 

Mas sigurado na ko karon. 

CHRISTINE 

(Mokatawa gamay si CHRISTINE ug dagkotan 

niya ang sigarilyo.) 

Kanus-a ra ba tong nakadungog ko anang mga pulonga? Gabalik-balik ra jod kag hisgot aron. Wala pod uroy ta pul-i, no? Makapangutana man sad tag, ‘ngano pod kaha?’ 

ALBERT 

Unsay ngano? 

CHRISTINE 

Sa ikapila na natong undang. Kadtong uyab pa, buwag-balik. Mao ra gihapon nga ingon ani na ta? Magbinalikasay pa tang duha, hapit na magpatyanay, mga tawo nga ming-agi sa atong kinabuhi- Maghulatay ta nga maundang ni, maghulatanay ra pod ta para mobalik. Ngano na? Kon buot hunahunaon, wala man niy pulos og unsay naa natong duha. Pero ngano jod kaha? 

ALBERT 

Ah! Sakita sad sa walay pulos, uy. 

CHRISTINE 

Tungod seguro sa kadaghang mahitabo sa imong kinabuhi modawat na lang kag bisan unsa. Morag buslot nga pambot nga gahangat og hinaw-as sa tubig maong andam na lamang kang maunlod. 

ALBERT 

Pero kita ra man sad ang gabangag sa atong pambot. Naghaw-as sa tubig ang usa, ang usa gibuslot. Kon dili, bali ra pod. (Pitik.) Nangita ra baya tag katagbawan nga dili nato mahatag sa usag usa? Kon dili man gani katagbawan, kanang makatabang nato og haw-as sa mga butang nga makapalumos kanato. 

CHRISTINE 

Pero nganong magbalik-balik man tas usag usa? Seguro kay wala poy mga hinungdan ang atong gipangita. (Pitik.) Pero nganong sige sad tag kaundang? Wala ba poy hinungdan ning anaa nato? (Pitik.) Mosugot ra diay ka nga wala niy pulos kon unsay anaa nato? 

ALBERT 

Hmm, para nimo, wala kaha niy pulos? 

CHRISTINE 

Tubaga sa ko. 

ALBERT 

Ay, ako say tubaga. Ikay unang gahisgot nga way tay pulos. CHRISTINE 

Kalain, di baya na mao akong giingun, ha. Usa pa, akoy unang nangutana nimo. 

ALBERT 

(Nagpangagho si ALBERT.) 

Unsa gani tong imong pangutana? 

CHRISTINE 

Kon naa ba niy pulos o hinungdan ning unsay naa nato?

ALBERT 

Ambot lang bitaw. Wala koy lig-on nga tubag anang pangutanaha. Pero kon bout hunahunaon, bisan og magkawala ta, naa ra gihapon ta dinh. 

CHRISTINE 

Namilosopo ka nako? 

ALBERT 

Ha? Wala baya, ha. 

CHRISTINE 

(Mokatawa og gamay si CHRISTINE.) 

Binuang ra gani. Kini siya ba. 

ALBERT 

Ambot nimo, uy. Pero buot ipasabot ba, nagpabilin ra baya gihapon ta para sa usag usa. (Pitik.) Ikaw na pod kuno, bi. Tubaga ang pangutana. Dapat pina-Binibining Pilipinas ang tubag, ha. 

(Mobarog si CHRISTINE ug morampa ug mopaso 

sa atubangan ni ALBERT. 

(Mokatawa si ALBERT pagmaayo ug iyang 

pakpakan si CHRISTINE.) 

Whooooo! Awwwwoo! Christine, Christine, Christine! 

CHRISTINE 

Salamat kaayo sa maong pangutana. 

ALBERT 

Pasulabi sad ni siya. Lingkod lang god diri tupad nako.

(Moduol ug motupad si CHRISTINE kang ALBERT 

(Inig lingkod ni CHRISTINE, halokan siya ni 

ALBERT og lawom pero dali ra nga halok.) 

Sige, tubaga na ang pangutana. 

CHRISTINE 

Ehem. Kadali lang jod. Unsa gani to? 

ALBERT 

Kon naa ba niy pulos ang unsay naa nato. 

CHRISTINE 

Nahigugma pa ba ka nako? 

ALBERT 

Ha? Unsa? 

CHRISTINE 

Kahibalo kong dugay na sad nga panahon ang minglabay nga kita nagkahigugmaay. Pila na sad ka baye ang minglabay sa imong kamot. Pero nahigugma pa ba ka nako? (Pitik.) 

ALBERT 

Gabinuang na sad ka? 

CHRISTINE 

Wala, uy. Kon gahigugmaanay pa ta, unya moingon ta nga walay pulos ang unsay naa natong duha, unsay pasabot aning atong gugma? Nga wala lang? Apan bisan pag wala, wala na lang pod bay bili ang gugma nato sa una? 

ALBERT 

Nahigugma pa ka nako? 

CHRISTINE 

Dili ko makaingon nimo nga wala. (Pitik.) Ikaw? Nahigugma pa ba ka nako? 

ALBERT 

Dili sad ko makaingon nga wala. 

CHRISTINE 

Ah, mao nang nagpaniksik kas ubang baye. 

(Dili motubag si ALBERT ug mobarog ra siya 

pero magunitan siya ni CHRISTINE.) 

Kini siya ba, dili madalag sulog. Lingkod ra god. 

ALBERT 

(Iwakli ni ALBERT si CHRISTINE. Dayon, iyang tudluon si CHRISTINE.) 

Dula-dula ra ba ning tanan para nimo? Ha? Binuang na lang ba jod ning tanan para nimo? Mao ning lisod tang magkasinabot kay 

CHRISTINE 

(Iwakli ni CHRISTINE ang tudlo ni ALBERT ug sumbalikon niyag tudlo si ALBERT.) 

Kay ngano man? Tubag! Kay puwerte man nimong kainosenteha.

ALBERT 

Oo, sakto ka, di man ko limpiyo. Ang akoa ra man untang gusto nga dili na lang sa tanang butang magdula-dula ka. 

CHRISTINE 

(Mobarog si CHRISTINE sa pikas bahin sa kama.) 

Ngano? Bata na lang jod diay ang imong lantaw kanako?

ALBERT 

Wa man sad kay buot! 

CHRISTINE 

Way buot? Nag-unsa pa diay ko diria kon dula-dula ra man diay ni para nako? Ako ra jong ipusta ang akong dignidad ug pagka babaye, magbilangkad-bilangkad ko dinhi para nimo kon binuang ra man diay tanan? Sa tinud-anay, galibog ra pod ko sama nimo. Maylang ka kay naa na man diay kay nakit-an, tagahoka ka. Bug-at ning tanan para kanako. Kahibalo ba ka ana? (Pitik.) Tubaga ko! 

(Dili motubag si ALBERT ug maglingo-lingo siya sa iyang ulo.

Mosulay og estorya si CHRISTINE pero walay 

pulong nga mogawas sa iyang baba. Magkanga-kanga 

siya.) 

(Molingkod si CHRISTINE kilid sa kama.) 

CHRISTINE 

Nganong ing-anihon ra man ko nimo? 

(Dili sila magtingganay sa pipila ka 

segundo ug mopunit si CHRISTINE og 

sigarilyo ug manuli niya sa lighter.) 

Hain ra man tung ligh- 

(Dungkaan siya ni ALBERT apan labnihon ni 

CHRISTINE ang lighter.) 

ALBERT 

Anaa na pod ta ani. Ambot ba, uy. 

CHRISTINE 

Wala lagi joy pulos ning tanan. 

ALBERT 

Unsa may hunahuna nimo? 

CHRISTINE 

Hunahuna sa unsa? 

ALBERT 

Kon unsaon ni nato. 

CHRISTINE 

Ambot. Wala ko kahibalo. 

ALBERT 

Gahulat ko nimo. 

CHRISTINE 

Akoy dapat maghulat nimo. Ikay gaingon-ingon nga undangon na ni nato.

ALBERT 

Gihigugma pa man seguro nato ang usag usa, di ba? 

CHRISTINE 

Kon unsa man gani ang tubag, dili gihapon igo ang gugma. Kay ngano man? Kay ang mahitabo ilimod ra gihapon nato atong mga problema hangtod dili na kaya. Hangtod mangbuto ta, hangtod moabot ra gihapon ta dinhi. (Pitik.) 

ALBERT 

Unsay puydeng buhaton nato? 

CHRISTINE 

Naa koy nahunahunaan. 

ALBERT 

Unsa man na? 

CHRISTINE 

Naa koy nabasahan. 

ALBERT 

Imo na pod kong sungogon? 

(Hapakon ni CHRISTINE si ALBERT og unlan.) 

Oh, kinsa may pikon ron? 

(Manipat si CHRISTINE.) 

Sige daw, unsa man nang imong nabasahan? 

CHRISTINE 

Kon sulayan daw nato nga magpakaaron-ingnon ta nga naa tay paki sa usag usa. Mag-estorya ra god ta god. Magpahungaw ba. 

ALBERT 

Wala na diay kay paki nako? 

CHRISTINE 

Wala. 

ALBERT 

Agay! Unsa man say estoryahan nato? 

CHRISTINE 

Ikaw god. Bisag unsay gusto nato. Kon unsay gusto nimong estoryahan o ipahungaw. Basin ganahan kang moestorya sa imong mga paniksik. Ikaw ra joy bahala. Ang importante maghinatagay tag tinud-anay nga bili sa estorya sa usa. Maminaw ta sa usag usa, ha. Ha? 

(Motando si ALBERT.) 

Unya akoy una. 

(Nakalitan ug adunay kalain sa buot ang paglantaw ni ALBERT ngadto kang CHRISTINE.)

ALBERT 

Sige, maminaw ko nimo. 

CHRISTINE 

Sugdan nako, ha. 

ALBERT 

Sige, sugdi na dayon. 

CHRISTINE 

Dili jod ko kauyon usahay nga dili ko nimo tarong-tarongon. 

(Molantaw si ALBERT kang CHRISTINE nga mora 

siyag galibog kon sakto ba ang iyang 

nadunggan. Moatras gamay ang lawas ni 

ALBERT aron tutokan si CHRSTINE.) 

Kanang abi na lang jod nimo nga tanan nga mogawas sa akong baba binuang na lang jod. Kahibalo ra baya ko molugar sa akong kaugalingon. 

ALBERT 

Ha, mao ba diay? 

CHRISTINE 

Akoa pa man ron nga panahon, ayaw sa og sabat diha. 

ALBERT 

Pasayloa. Padayon, padayon. 

CHRISTINE 

Dili ko ganahan anang dili ko nimo paminawon usahay. 

(Motando si ALBERT pero gatanga ra.) 

ALBERT 

Bitaw sa. 

CHRISTINE 

Kanang magyango-yango ra ka nako. Bisag wala jod kay nasabtan bisag usa ka pulong god. 

(Magsige ra gihapon og tando si ALBERT.) 

Kanang imong otin gamay. 

(Lingion ni ALBERT si CHRISTINE.) 

ALBERT 

Laina nimo, uy, mangaway man ka. 

CHRISTINE 

Aw, naminaw jod diay. 

ALBERT 

Naminaw man jod ko. Ingon ka nga dili ka ganahan nga di paminawon. O, di ba, naminaw ko. 

(Gihapak ni CHRISTINE si ALBERT nga 

pinahiyom gamit ang unlan samtang gakatawa 

siya.) 

CHRISTINE 

Sige, ikaw na pod kunoy estorya, bi, unya akoy maminaw.

ALBERT 

Paminaw, ha. 

CHRISTINE 

Alangan man. 

ALBERT 

Dili ko nimo binuangan, ha. 

CHRISTINE 

Sige na, dili lagi. 

(Moginhawa og lawom si ALBERT.) 

ALBERT 

Ang labing ganahan nako sa tibuok kalibotan, no, kanang masabtan ko. Nga iniglantaw bitaw sa usa ka tawo nako dili ang akong sayop ug mga kalapasan ang iyang unang makita. Kondili kinsa jod ko nga pagka tawo. Mao ra man jod guro nay gusto nato isip usa ka tawo god. Nga makit-an ta ug masabtan inigkita nila, iniglantaw nila sa atong mga mata. Hubad ka sa kon kinsa jod ka. (Pitik.) Sa pipilang ming-agi nga tuig kong naglakaw ug nabuhi aning kalibotana, sa mga tawong naila-ila nako, ug mga babaye nga akong nauyab, wala joy bisan usa kanila nga nakasabot sama nimo. (Pitik.) Lahi ra jod kaayo ka ba. Mora gani kag usa ka bato nga gilabay sa akong lawom nga lanaw nga inig tugdang nimo molutaw ug mogawas jod ang tinuod nga ako. Mga butang mahitungod sa akong kaugalingon nga gipangtagoan nako. 

(Mohilom og pipila ka segundo.) 

CHRISTINE 

(Magkanga-kanga si CHRISTINE.) 

P-pila na sad ka baye ang nahulog anang mga pulonga? 

ALBERT 

Tinud-anay ning akoa. 

(Kab-oton ni ALBERT ang kamot ni CHRISTINE ug gunitan kini.) 

Hinumdomi kon kinsa ang akong giduol sa panahon sa akong panginahanglan ug akong pangitaon nga kasandigan. 

(Magtinutokay si CHRISTINE ug si ALBERT.) 

CHRISTINE 

Dili, dili, dili. 

(Dili molantaw si CHRISTINE kang ALBERT.) 

ALBERT 

Unsay dili? Ayaw kuno kog talikdi. 

(Gunitan ni ALBERT ang aping ni CHRISTINE aron iatubang ngadto sa iyang nawong.) 

Lantawa ko. Tutoki ang akong mga mata. 

(Magtutok nga walay tingog.) 

Kanimo ra jod ko makasalig. Kahibalo jod ka ana. Bisan asa pa ko maabot, pila pa ka baye ang akong makuyog, bisan kinsa pa na ang moagi sa akong kinabuhi, kanimo ra jod ko magbalik-balik. (Pitik.) Kahibalo ko nga makasabot jod ka nako. Sayod jod ko. 

(Halokan ni ALBERT ang agtang ni CHRISTINE ug mag-abot ang ilang mata sa pag-usab. 

Magdug-ol ang ilang mga dagway sa hinay-hinay hangtod sila maghinalokay. 

Moundang sila kadali ug pahigdaon ni ALBERT si CHRISTINE ug maghinalokay sila pag-usab. 

Mapalong ang suga. 

Kataposan sa Akto