Tinagutlo nga Pag-aninaw sa Tuboran
Jovanie Garay I.
subay ning sandayong midagayday
ang tubig gikan nianang tubod sa karaang kamansi
diin giugbok mo ang talinggab sa patong nga kawayan diha sa iyang kasingkasing
ug mibugwak ang iyang tam-is nga luha
kon imong tutokan ning gisubayan sa tubig
ang lumot mikunot na, apan lunhaw gihapon—himsog, ambongan, walay sama
nga misala sa bul-og sa luha sa kalipay
timan-i:
kining tubora mao ang matuod nga katagbawan sa kalibotan nga
bisan sa kataposang lad-ok sa tamsi, mobalik ug mobalik siya aron sa pagsigop sa sabaw nga inipis sa iyang Inahan
Read More