Author: Jason Pozon

Si G. Jason Federigan Pozon ay nagtapos ng Bachelor in Secondary Education major in Filipino sa Pamantasang Normal ng Pilipinas (PNU-Manila) noong 2014. Nagtapos ng MA Malikhaing Pagsulat sa Departamento ng Filipino at Panitikan ng Pilipinas sa Unibersidad ng Pilipinas-Diliman. Fellow ng 6 th Cordillera Creative Writing Workshop sa UP Baguio (2018); IKa-13 Palihang Rogelio Sicat sa UP Los Baños (2019); at Ika-4 na Palihang Bienvenido Lumbera sa Salin ng UP Institute of Creative Writing ng UP Diliman. Nakapaglathala ng mga malikhaing ‘di-katha sa mga literary refereed journal ng Sentro sa Wikang Filipino-UP Diliman, Cultural Center of the Philippines at Pambansang Samahan sa Linggwistika at Literaturang Filipino. Katuwang na propesor at nagtuturo ng Panunuring Pampanitikan, Introduksyon sa Pagsasalin sa Mataas na Paaralang Rural ng Unibersidad ng Pilipinas (UP Rural High School) sa ilalim ng Kolehiyo ng Agham at Sining sa Unibersidad ng Pilipinas Los Baños. Kasalukuyang kalihim ng All UP Academic Employees Union-Los Baños at kinikilalang manunulat at guro sa panitikan ng National Book Development Board o NBDB. Patuloy na nagtatangka at tinutuklas ang sarili at isinasabuhay ang katuturan ng kaniyang pag-iral.

  • Makinang de Pedal

    Malaking gulong, maliit na gulong dapat pabulong galit na dagundong Bakal ay kinakalawang palad na magaspang ngalay na balakang lubog sa utang Makinang de pedal modistang sinasakal kaluluwang isinakdal masa ang nagluwal Ganid na higante pasan ng mga pesante malabong mga lente “Kailan tayo aabante?”

  • Manikin

    Santo ng mga modista Bestidang paiba-iba tila artista laging tulala Maniking buhay nanlulupaypay lihim na salaysay trabahong nilalamay Walang bibig malayong pagkakatitig naumid na tinig “Sinong makikinig?” Kaniyang nababatid panghahalay ng ganid benepisyong tinipid tahiang naipinid

  • Medida

    Kakaibang alampay pagkataong gutay-gutay misteryosong kaakbay bunton ng mga retasong lumbay Pangarap na mailap medidang natutuklap sinukat ang hirap Di marating ang alapaap Inilapat sa dibdib at braso kupas na numero Sa hari sumasaludo kamao ng proletaryo Pinagdugtong, ibinuhol Linyang hindi naputol negosyanteng nauulol Nasa piketlayn ang hatol

  • Karayom

    ‘Sanlibong tinik gumapang, pumanhik binikig ang mga titik sa mapayapang paghibik Bawal ang pag-ihi marahang dumampi labi ng bote sa labi napuno ng luwalhati Salisihang namamaluktot Reta-retaso ang kumot laging may bantulot “Kailan makalilimot?” Natatastas na diwa doo’y nakita ga-karayom ang halaga manggagawang makinarya