Matud pa sa “Language and Identity,”
importanteng sayud kita
sa atong pinulongan
kay kini ang atong
ginagamit sa sinultian.
Pulong ang gapamatuod
sa atong kailhanan,
ug sa paggamit niini
kita maluwas sa katalagman
nga gikan sa gahum
sa laing pinulongan.
Maoy giingon sa “Language and Identity.”
Apan sa akong pagsuwat
gamit sa akong pinulongan,
gipangbadlisan ang matag pulong
sa akong gimugnang balak:
Halongan ko kining pinulongan…
Dili makambyohan kon kini mawala…
Alang niini ako mainchindihan…
Badlis ang nagsignos nga dapat
pinulongan ko ang mag-usab:
Ampingan ko kining pinulongan…
Dili masuklian kon kini mawala…
Alang niini ako masabtan…
Apan nidungog sa paghangyo
ang nipadayun sa pagkupot
uban sa mga garay nga gimugna:
Palihug lang, mao akong naandan abi.
Ug sa pagbadlis niini
kailhanan ko napanas.
Leave a Reply