Malaking gulong,
maliit na gulong
dapat pabulong
galit na dagundong
Bakal ay kinakalawang
palad na magaspang
ngalay na balakang
lubog sa utang
Makinang de pedal
modistang sinasakal
kaluluwang isinakdal
masa ang nagluwal
Ganid na higante
pasan ng mga pesante
malabong mga lente
“Kailan tayo aabante?”
Santo ng mga modista
Bestidang paiba-iba
tila artista
laging tulala
Maniking buhay
nanlulupaypay
lihim na salaysay
trabahong nilalamay
Walang bibig
malayong pagkakatitig
naumid na tinig
“Sinong makikinig?”
Kaniyang nababatid
panghahalay ng ganid
benepisyong tinipid
tahiang naipinid
Kakaibang alampay
pagkataong gutay-gutay
misteryosong kaakbay
bunton ng mga retasong lumbay
Pangarap na mailap
medidang natutuklap
sinukat ang hirap
Di marating ang alapaap
Inilapat sa dibdib at braso
kupas na numero
Sa hari sumasaludo
kamao ng proletaryo
Pinagdugtong, ibinuhol
Linyang hindi naputol
negosyanteng nauulol
Nasa piketlayn ang hatol
‘Sanlibong tinik
gumapang, pumanhik
binikig ang mga titik
sa mapayapang paghibik
Bawal ang pag-ihi
marahang dumampi
labi ng bote sa labi
napuno ng luwalhati
Salisihang namamaluktot
Reta-retaso ang kumot
laging may bantulot
“Kailan makalilimot?”
Natatastas na diwa
doo’y nakita
ga-karayom ang halaga
manggagawang makinarya
Hukayin natin ang langit
Masarap doon
Naga awas awas ang gatas at dugos
Kahayahay ng buhay, Kahayahay ng buhay
Hukayin natin ang langit
Makakita lahat, walang mabulag
Makalakad ang mga pilay
Makarinig ang mga bingi
Makakain ang mga gutom sa bulawan
Kaya hukayin natin ang langit
Wag ka mag pa luya luya
Ang mga ugat, bato, lupa bungkalin
Ang mga laman, buto, dugo sipsipin
Lahat ng naka tanim langkatin
Hukayin natin ang langit
Hukayin natin ang langit
Wag pansinin ang init
Wag pansinin ang init
Makapal ang balat natin
Makapal ang mga mukha natin
Wag pansinin ang mga shagit
Naga palalim nang palalim
Naga painit nang painit
Kahit batok na ang ating mga panit
at nagalakas dahan dahan ang mga shagit
Hukayin natin ang langit
Hukayin natin ang langit
Jason Pozon 
Gerald Galindez