Gihipos ko na ang makina
ug palong na ang suga
kay sa imo nang gikaingon, di pwedeng
magtahi sa gabii, mohabol ang dagom,
o magputol sa mga nuog, motalaw ang gunting.
Busa sa buntag, ako nang tabason
gitipig-tipigan mong panapton. Tahion
tanang sidsid aron pormahog habol,
kay dili ba kini man imong gipanamilit?
Hipuson ko dayon kining makina
ug palungon na ang suga.
Sa damag, kitaon ko ikaw pagbalik
sa panumduman. Suginlan ko ikaw
sa pipila ka mga habol nga misulay’g bukot
sa akong kahidlaw
samtang gihipos ko ang makina
ug ang suga palong na.
Leave a Reply