Nagtagana ang Katitikan og luna alang sa mga Habagatanong tingog nga naandang giila sa panabot-eskolastika, ug kadtong eskolastikanhong mga obra nga naghisgot sa Pilipinas isip diskurso sa Habagatan.
Ang ispesyal nga isyu sa Katitikan nga “Paghandom ug Paglimot” maglangkob sa personal ug kolektibong kasinatian sa panumdoman. Ang panumdoman naghulma sa atong pagkatawo, nagkupot sa atong mga kasakit, kalipay, ug kasaysayan. Samtang ang paglimot usa ka buhi nga proseso—usa ka pagsugod pag-usab o usa ka pagsalikway sa mga butang nga nagpabug-at sa atong hunahuna.
Ang paghandom ug paglimot mag-agad usab sa gibug-aton sa kasinatian. Sa atong pagpaningkamot nga mahinumdom, aduna usab kitay kahadlok sa mga panumdoman nga hinay-hinay nang nangapapas—mga ngalan nga nakalimtan ug mga sugilanon nga nag-anam na og kalubong sa kasaysayan.
Kini nga isyu nag-ila nga ang pagpili sa kon unsay angayng kalimtan ug hinumdoman adunay personal ug politikal nga hinungdan. Sa kapaspas sa teknolohiya ug sa dagan sa panahon, dili layo nga mapapas usab ang mga mahinungdanong panghitabo sa kasaysayan.
Sayod kini nga isyu sa panagbangi tali sa paghandom ug paglimot—ug sa kamatuoran nga gamhanan ang kalimot, apan labing gamhanan ang paghinumdom.
Mamahimong mosalmot sa mga mosunod:
*Balak nga dili molapas sa 60 ka linya (matag usa)
*Sugilanon nga anaa sa 1,500 hangtod 4,000 ka pulong
*Sugikiblat nga anaa sa 100 hangtod 1,000 ka pulong
*Usa ka Anib sa Nobela, apil ang lakbit-saysay, nga anaa sa 2,000 hangtod 4,000 ka pulong
*Gumalaysay nga anaa sa 2,500 hangtod 4,000 ka pulong
*Usa-Ka-Aktong Dula, Salida, o tipik sa Dulang Hingpit-Ang-Gitas-on, nga anaa sa 10 hangtod 25 ka panid
*Kritikal nga Gumalaysay kabahin sa Katitikang Pilipino ug/o sa Habagatang Pilipinas, nga anaa sa 1,500 hangtod 5,000 ka pulong, gamit ang MLA nga pormat.
Usa ka peer-reviewed ug libreng maablihan nga katitikanong diyurnal ang Katitikan: Literary Journal of the Philippine South nga nag-ugmad og lunang pangdiskurso alang sa mga magsusulat, eskolar, ug tadiyandi aron hisgotan ang Pilipinas sa Habagatanong diskurso ug ang Habagatang Pilipinas isip minugna sa kultura ug gipuy-ang reyalidad. Gitinguha niini ang paghagpat ug paghanduraw sa mga mugnang katitikanon nga naggikan sa kahilitan, nagpasundayag sa Habagatan isip dapit diin kritikal ang pamaagi sa mga pangutanang intelektuwal ug diyandihanon.
Tungod naggamot kini sa mamugnaong inobasyon ug akademikanhong paninguha, nagsubay ang Katitikan sa proseso sa pag-peer-review, nagseguro nga ang namantala niining mga obra nagsamin sa eskolastikanhon ug/o katitikanong merito. Pinaagi sa pagtagana og sayon maablihan apan kritikal gihapon nga plataporma, gipuy-an sa diyurnal ang dekolonyal nga panan-aw, pakiglambigit sa katitikang rehiyunal, ug panagbagat sa mga dayalogo sa nagkalain-laing disiplina, ug gumikan niini gipalanog ang mga naratibong nakigbatok sa hegemonikong paradigma ug gisibog ang kahilitan paingon sa daynamikong sentro sa panabot ug imahinasyon.
Ipadala ang inyong obra pinaagi sa email gamit ang doc. o docx. nga pormat, ug gamiti og file name nga [Genre]_[Ulohan]_[Apelyido sa Tagsulat] (pananglitan: Balak_Hello_Dela Cruz), ngadto sa katitikan.journal@gmail.com, apil ang ngalan sa tagsulat, ug mubong bionote.
Ang submission guidelines mabasa usab dinhi.