Ang Lab-asiro sa Madamguhong Dakbayan

Maaghopon na gilukdo sa lab-asiro ang iyang mga damgong hinimbisan samtang wa pa gilitok sa anago ang banagbanag. “O diara! Ali namo! Siyagit niya samtang gisuroy sa tibuok dakbayang gahilam-os pa sa hilang na yamog sa kagahapon. “Palit namo lab-as pa!”, linghod niya na siyagit pabalik-balik hangtud kini gaalingawngaw taliwala sa mga nagbuntaog na ganghaang marmol diin siya nihunong para mudiskanso ilawm sa balite nga gihuboan og kinabuhi. Sa iya pagpahulay, dunay nigimaw usa ka gakumong na mga lungsuranon na murag tangkig sa kalubog ang kalimutaw. Miduol kini og mitudlo sa iyang wala nga kamot. “O diara sir,  damgo lab-as pa! Unsa imo gusto sir? Duna tay mga damgo nga mga pulong nangawala sa panumduman” iya ingon dala tunol sa lungsoranon apan wala kini nitubag. Nikuot siya pagusab sa banyera. “Kini sir damgo sa usa ka banwang nahanaw na” iya sumpay apan wala gihapon nitingog ang maong lungsoranon. Taudtaod nitudlo kining maong lunsoranon sa usa ka damgong naa sa sulod sa iya bulsa. Nakuratan ang lab-asiro kay wa niya damha na makita sa usa ka lungsoranon ang iyang kaugalingong damgong gitagoan sa kalibutan. Gaduha-duha siya og kuot sa iya bulsa pero niduol kining maong lungsuranon og mitiad nagpakita sang naglagom niya nga hasang og  mitiyabaw. Niyango balik ang lab-asiro og ni kuot sa iya bulsa og usa ka lumoy na damgo ug gitunol sa lungsoranong ga tabisay ang laway na milamoy rapud diretso niini. Unya pila ka gutlo nikalit og kadan-ag ang hulagway sa lungsuranon ug nipino ang kalimutaw dalang siyaok na murag nagawsan agig pakighilawas. Pagkadunggog sa uban lungsoranon nanagan sila og gidumog ang yanong lab-asiro taman sa nahurot ang iya damgo ug gihinay-hinay nalang nila og labnot ang mga kamot og kulamoy niini og gi pasa-pasa para ilamoy sa kilid-kilid. Human aning ila kumbira namarog sila og nagkuot og sinsilyo sa ilang bulsa og gitahan sa banyerang haw-ang dayun panguli sa ila kadaiyang kinabuhi. Kada antog sa sinsiyo sa lata madunggog ang danguyngoy sa ilang mga damgong gipukot sulod sa bungol nga kaban ilawn sa ila mga dughan.